Vehem

Roz ki tarah ik roz main
baitha jab khidki kinaarey,
haathon mein kaagaz, hothon pe chuski
sooraj taley, bas thakey haarey

Maana ki din bhar kaam tha,
do pal to ab aaraam tha,
bas tab hi ik khag fadfadaata
aan baitha khidki kinaarey.

Vo bola," Ae insaan pyaarey!
Ik pyaala to main bhi piyunga
bas itna sa upkaar karde, 
fir apna rasta naap lunga"

Maine kaha," Ae laghu pakshi!
tujhe daant-te na main darunga,
lajja hai to udd jaa, nahin to
kaanon taley kantaap doonga!"

Ascharya to mujhe tab hua jab
vo has padaa sunn baat meri,
maine kaha,"hasta hai kyun bey!
chal jaane de, mujhko hai deri."

(javaab usne kuch yun diya ki)
"Ae insaan sach kahun, roka bohot
jaan kar haalat ye teri,
par dekh kar tujhe tilmilaata,
batteesi nikal aai meri.

Aur sach kahun? dhikkaar hai!
teri is tarah kismat fati par.
Tere laghu deemag par,
aur teri insecurity par.

Bandhvaa hai tu society ka,
teri soch to barbaad hai.
Aur ae khuda! Irony dekho,
kehta ki tu aazaad hai."

Is tarah sunn baat uski,
mere gyaan ke sailaab jaage.
Sab uljhanein lage chudaane,
mere shabdon ke mazboot dhaagey.

Phir bola main (ki),"Sunn o panchhi!
badle hain humne bhi zamaane.
Zaraa soch jag insaan ke bin,
phir aaegi teri matt thikaane.

Maana ki main hun sabse pehley,
par niyamon ke baad hun.
Maana ki khudka daas hun,
par isliye aazaad hun.

Mera to jigraa bhi badaa hai,
akl ki kya baat hai!
Or jaanle, ke mere aage,
saare jag ki maat hai."

Haazirjavaabi tha mahashay,
rukta kahaan tha vo bhala.
Phir khol daali chonch usne,
fir bol baitha karamjalaa.

Bola ki-
"Tune teer maara konsa,
ye 'Hulk' sa shareer paakar.
Pohonch paaya kya tu rab tak,
raakh se niyam banaa kar?

Khair,
Jab tak ye pyaala khatm hoga,
das-barah dar to choom loonga.
aur ae aazaad,
jab tak tatolega tu kaagaz,
ye saara jag main ghoom loonga."